Черетан сеҥымаш — у пашалан шӱкалтыш!

Тиде чолга марий ӱдыр дене вашлиймеке, шуко ум, оҥайым пален налаш лиеш. Тудо эре ойла: «Уста еҥ чыла шотышто уста лийшаш». Кажне арнян тудо мемнан дене «Пошкудем» видеоканалыште саламлалтеш, «Шӱмсем пӧлекым» кучыкта. Чон йодмо почеш видеоочерк-влакым ямдыла. Шкенжым видеофильм ыштымаштат терга. Тиде чолга, сылне, мотор марий ӱдыр Алёна Иванова.
Пытартыш кок ий жапыште Алёна икмыняр фильмым войзен. Калыкыште «Кугу корка але Виче кундемын пӱрымашыже», «Тӱрлемӱдыр», «Илыше вӱд», «Юмын пӱрымӧ вольык», «Кӧтремъ» фильмже-влак сайын палыме улыт. Марий Кугыжаныш университетын усталык коллективше дене пырля 2014 ийыште «Ший Пампалче» фильмым сниматленыт.
Пашам ыштыме гутлаште Алёна шкенжым тӱрлӧ конкурслаште терга. Шукерте огыл, ме тудым Финн-угор калык-влакын II тӱнямбалысе кинофорумжо гыч (FUFF) вашлийна. Алёна Ивановам тӱнямбал кӱкшытысӧ жюри спецприз дене палемден.
«Таче уло тӱнямбалне изи калыкын илышыже да пӱрымашыже нерген ятыр пашам ямдылат. Тидлан кугу тӱткышым ойырат. Меат шке коллективыштына марий калык нерген документальный фильм-влакым ямдылена. Палемдыде огеш лий режиссёр Сергей Волковым, оператор Сергей Камышкиным, да мутат уке, журналист да сценарист Алёна Ивановам. Чылаштымат эше ик сеҥымаш дене саламлем,» — ойла «Марий Эл» кугыжаныш теле да радио компанийын вуйлатышыже Мария Митьшева.
«Кӧтремъ» киношто апшат паша нерген каласкалалтеш. Иван Грозныйын вуйлатыме жапше гыч калыклан таптымым чареныт улмаш, туге гынат марий яллаште тиде сомылым арален коденыт. Киноочеркыште Николай Тимофеев да тудын тунемшыже-влакын Марий-Турекысе посёлкысо апшаткудышто ыштыме пашаштым войзымо.

Мут толмашеш, национальный вещаний сферыште «Кӧтремъ» кино Алёна Иванован икымше сеҥымашыже огыл. 2014 ийыште Коми республикысе Сыктывкар олаште эртыше «Времени живая нить» регион-влак кокласе творческий фото паша да видеосюжет-влак конкурсышто тиде кино I верым налын, а тений Йошкар-Олаште эртыше калык усталык, тӱвыра да этнографийлан пӧлеклалтше VI Россий кӱкшытан фестивальыште Марий Элын тӱвыран сулло пашаеҥже, «Марий Эл» кугыжаныш теле да радио компанийын операторжо Сергей Камышкын «Эн сай оператор» семын палемдалтын.
Ме ты усталык коллектив деч ончыкшымат сай деч сай, келге шонымашан, паша-влакым вучен кодына.

Реклама

2 thoughts on “Черетан сеҥымаш — у пашалан шӱкалтыш!

  1. Алёна, мый уло кумылын тыйым черетан сеҥымашет дене алал кумылын саламлем. Шке пашат-влак гоч марий калыкын поян тӱвыражым, йӱлажым моло калыклан палдарен шогет. Марий калыкын лӱмжым йот эллаштат нӧлтет. Тыйын кажне пашат ойыртемалтше да шкешотан. Марий телевидений полшымо дене мемнан усталык пашана дене палдарет. Мый тый денет моткоч кугешнем. Ончыкыжымат тый дечет у, келге шонымашан паша-влакым вучен кодына.

    Марий Эл тӱвыран сулло пашаеҥже, Россий кӱкшытан «Калык усталык» фестивальын лауреатше АННА ОСМАНОВА.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s