Самырык-влак коклаште — вуйлатыше!

DEN_0953Алексей МарГУ-со физике да математике факультетыште V-ше курсышто тунемеш. Кызыт тудо диплом пашам воза, кугыжаныш экзаменым кучаш ямдылалтеш. Мер пашаште чолгалыкым ончыкта, ынде кокымшо ий самырык-влакым ушен шогышо «ВийАр» культур кокласе кыл обществым вуйлата.
Лаштыкнан тачысе унаже — Алексей Очеев.
— Ола деч тораште огыл илет. А марла моткоч сайын, яндарын мутланет.
— Кум ияш марте ме Параньга районысо Олор ялыште иленна. Ачам-авам марий улыт, сандене мӧҥгыштат, коча-ковам дене ялыштат шочмо йылме дене мутланена. Адакшым йолташ-влакат шукынжо марий улыт.
— Обществым вуйлаташ тылат ӱшанымеке, лӱдмаш шижалтын огыл?
— Тӱҥалтыште кеч-кунамат лӱдмашан. Мыят ӧрмалгенам ыле. Университетыштат, факультетыштат студенческий самоуправленийын председательжылан шотлалтынам. А ындыжым сомыл оҥай. Паша ятыр. Шонымаш шуко. 
— Обществыш мыняр еҥ коштеш? 
-Лу наре ӱдыр-рвезе чумыргена. Нунын коклаште МарГУ-н студентше-влак улыт. Но южгунам «Юлтехыште» тунемше-шамычат уло кумылын ушнат.
ВийАр — самырык-влакым ушен шогышо толкын. Тудо ик ой дене тӱшкан пашам ышташ, тургыжландарыше йодыш-влакым пырля каҥашаш йӧным пуа. Тушко чолга, чулым койыш-шоктышан ӱдыр-рвезе-влак чылан ушнен кертыт.
— Могай паша шукталтеш?
— Самырык тукым тылзылан кок гана Т.Евсеев лӱмеш национальный тоштерыште «Йыргешке пӱкен» вашлиймашыш погынена. Тушто ыштышаш да ончыкылык паша нерген каҥашена. Шошым, Марий талешке кече вашеш, «Мый марла ойлем» акцийым эртарена. Сылнымут флеш-мобыш ушнена. А эн тӱҥ да кугу мероприятий тиде — тӱрлӧ регионышто илыше ӱдыр-рвезе-влаклан Марий самырык тукым слёт.
— Икмыняр ий ончыч «ВийАр» газетым луктеш ыле. А ындыжым ты йӱла деч молан кораҥын?
— Окса шотышто нелылык лектын ыле. Мыйын шонымаште, кызыт самырык тукым утларакше интернет йӧн дене пайдалана, эн ончыч лач туштак уверым эскера, муэш.
— Вуйлатыше лияш тылат келша?
— Келша. Кӱлешан улмемым, весылан полшен кертмемым шижам.
— Самырык-влакын шочмо йылмыштым йӧратымышт, вожылде мутланымышт шижалтеш? Тудым арален кодаш мом ыштыман?
— Марий йылмым йӧратыме ава шӧр дене толшаш. А рушаҥше ӱдыр-рвезе-влакын марий йылмым тунемаш эн ончычак кумылышт лийшаш. Нигӧлан, нимом виеш тушкаш ок лий. Адакшым марий самырык тукымлан чӱчкыдынрак вашлийын мутланыман, тӱрлӧ пайремым марла эртарыман.
А ме, «ВийАр» обществын еҥже-влак, марий йылмынам арален кодаш манын, журналым лукташ кутырен келшенна ыле. Но тиде сомыл уэш шийвундо дене кылдалтын.
— Визымше курсын студентше, мер пашаште тыршыше самырык еҥын яра жапше уло мо? Кузе тудым эртара?
— Поэзийым лудаш келша. Школышто тунеммем годым шкеат возкалаш тӧченам. Студент радамыш логалмекат ты шӱлыш ик жап лийын, но тыгай пашам вияҥден колташ жап кӱлеш. Электрон музыкым возем. Спорт денат кылым кучем, поснак баскетболла, волейболла модаш йӧратем. Факультетын баскетбол командыштыжат лийынам. Эше фотографироватлаш моткоч келша. Жап лиеш гын, мультимедий але дизайн дене курсышкат кошташ шонымаш уло.

А.Байкова мутланен. Д.Речкинын фотожо.
«Марий Эл» газет гыч налме.

Реклама

4 thoughts on “Самырык-влак коклаште — вуйлатыше!

  1. Олешлан «ВийАрым» вуйлатымаште чытышлыкым, вийым да арым-мунлыкым тыланем. «ВийАр» ушемын сайтше нигуш «йомын» колтен огыл ыле. Мыняре материалым колтенда — тунаре луктын оптенам да чыла тиде пашам 6 ий яра шуктен шогенам. Такшым сайтшым ончычат тыланда вийарзе-влаклан шкаланда пуаш манын ышталтын ыле, але марте вот ты сайтым шке ӱмбакыже налше еҥ лийын огыл. Ынде лектын — садлан пеш куаненам. А мый кертмем семын «ВийАрлан», ончычсо семынак, эре полшаш ямде улам.

  2. Моткоч ушан шонымаш,рвезе еНын. Талешке шке ийготшылан. У»шан шочеш-мари коклаште профессионал кушкеш. Элнан ончыклыкшо уло.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s