Курымеш кышам кода

«Уста айдеме илышыш ÿчашен пура… Шкеж деч вара мондалтдыме, волгыдо да ÿштылдымö кышам кода. Курымеш…» – тыге ойлен коден мемнан уста, кумдан палыме поэтна Валентин Христофорович Колумб. Тений тудын шочмыжлан 75 ий. Тиде чапле пайрем вашеш «ВийАр» ушем февральыште да мартыште Куженер районышто икмыняр вашлиймашым эртарыш. А 19 мартыште Тÿнямбал поэзий кече вашеш пайрем лие. Мемнам Куженер район Коҥганур школын туныктышыж ден тунемшыж-влак порын вашлийыч. «Молан ты верым ойырымо?» – йодышланат вашмут уло: «ВийАр» ушемын ик чолга еҥже Раисия Сунгурова Коҥганур школын тунемшыже-влак дене сылнымут кружокым наҥгая.

Поэзий пайрем чоным тарватыше почеламут корныла да ныжыл муро сем дене почылто. Самырык сылнымутчына Раисия Сунгурова шкенжым вÿдышо семын ончыктыш, мутсаскажым лудо.

Тунемше-влак арам погынен огытыл, почеламут-влакым марла, рушла йоҥгалтарышт. Диана Золотарёва шке возымо мутсаскажым темлыш. Мотор марий тувырым чиен, ÿдыр-влак такмак почеш тавалтышт.

«ВийАр» ушем ден пырля тыгай чолга еҥ-влак лийыныт: «Югорно» бард клубын ик эн уста еҥже, самодеятельный композитор да мурызо Геннадий Григорьев. Южо мурыжлан мутшымат шкежак воза. Тудо гитара сем почеш «Ош куэ», «Корныеҥ» да моло мурым йоҥгалтарыш, тунемше-влаклан почеламут гыч кузе муро шочмым умылтарыш, шкеж нерген каласкалыш. Поснак тунемше-влакым тудын пöлекше – «Корныеҥ» муро сборникше куандарыш.

Уна-влак коклаште «Кугарня» газетын корреспондентше, самырык поэтесса Эльвира Терентьева лийын. Тудым ончаш толшо-влак кумылын вашлийыч. Модышымат эртарыш, почеламутымат лудо, газетын уста пашаеҥже-влак нерген каласкалыш. «Ямде лий» газетын корреспондентше Людмила Григорьева Тÿнямбал поэзий кече вашеш возгален шогышо шольо-шÿжарже-влаклан таумутым кучыктыш. Палыме еҥын палемдымыже икшывын кумылжым нöлта да эше чот тыршаш кумылаҥда. Моло семынак книга, газет пöлекым ыштыш.

Пайрем куаным Коҥганур школын выпускницыже Марина Соколова кумдаҥдыш. Тений тудо Марий кугыжаныш университет пелен «Поэзий шепка» сылнымут клубыш ушнен, почеламут возымо мастарлыкшым шуара.

Поэт шÿм мутым илышыш луктеш гын, мурызо тудым шке йÿкшö гоч калык коклаш шара. Почеламутын семйоҥгалтмыжым Надежда Пашкина шуктыш, ныжылге йÿкшö кажнын чонышкыжо лайыкым пуртыш.

Пайрем кече Коҥганур школын тунемшыже-влакын чоныштышт пале кышам коден манын ÿшанен кодына. Молан манаш гын изи тулойып гыч кугу тулото ылыж кертеш. Кö пала, ала ты кундемыште эше ик талантан поэт шочеш.

Ирина Ташбулатова

Реклама

One thought on “Курымеш кышам кода

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s