Марий улам, марла ойлем, марий улмем дене кугешнем!

Пагалыме лудшо таҥ!

Российыште илыше да вияҥме шотышто шке корным ойырен налше финн-угор калык-влакын йылме йодышышт таче моткоч пÿсö. Ий гыч ийыш калык чот шагалемеш, шкештат шочмо йылме дене мутланыше да тидлан шочшыштым туныктышо, тÿвыра да йÿла деке шÿмаҥдыше, историйым шымлаш кумылаҥдыше-влакат ешаралтыт манаш огеш лий.

Тиде пашаште тÿҥ верыште еш шога. Школышто туныктышо-влак йылме йодышлан кугу верым ойырат, тунемше-влак дене шымлыме пашам шуктен шогат, ятыр мероприятийым эртарат гынат, чыла тидыже ешыште огеш пеҥгыдемдалт гын, йоча мом тунеммыжым пеш писын монда.

Эше тыгай койыш шижалтеш (поснак пытартыш жапыште): шуко самырык еҥже олашке тунемаш толеш але öрдыж кундемыш пашам ышташ кая гын, кö улмыжым мондышо «Йываныш» савырна. Тыгодым нуно мер пашамат шöрын ончат, самодеятельный коллективлашкат огыт кошт, марий журнал ден газет-влакын лÿмыштымат каласен огыт керт. Книга кевытлашке пурымо нергенже ойлыманат огыл. Шукышт «Мый Интернетыште чыла муам» маныт.

Туге гынат, марий книга марий еҥын уш-акылжым утларак пойдара. Вет шочмо йылме – ача-аван пуымо поянлык. Курым дене кугезе-влакна тиде йылме дене мутланеныт, таче марте арален коденыт, сылнымутлан шочаш да савыктышым вияҥдаш, театрым почаш йöным ыштеныт. Чылажат ышталтын ончыклыклан, кушкын толшо тукымлан.

Ме – рвезе вий-куатан тукым огыл гын – кö таче шочмо йылмынам арала, тудым вияҥден колтымо верч тырша? Кажныже шке семынже, шке кÿкшытшö гыч. Сандене ончыкшымат «ВийАр» ушемын еҥже-влак Йошкар-Олаштына «Мый марла ойлем!» акцийым увертарена. Меат вияҥшаш корным рашемдаш тыршена, сандене урем мучко эртышыла «Поро кече, те марла кутыреда?» манын йодыт гын, ида öр, акцийыш ушныза. Палемден кодынена: тений акций Марий Элнан рÿдолаштыже гына огыл, тыгак Пошкырт Республикыште эртен. Кумылан-влак Киров ден Одо кундемыштат улыт. Ончыкшым нунат «Мый марла ойлем!» акцийым шке кундемыштышт эртарат. Кузе тудо эрташ тÿҥалме нерген тачылан тыгерак каласен кертына: концерт, конференций але калык дене тыглай вашлиймаш-влак лийыт. Чыладам пагален ÿжына!

Лийза мемнан дене пырля! Кушcа да вияҥза, шочмо калыкнан ÿшанле эртышыже лийза!

Кöн шÿмжö марий верч кыра,
Со чонжо марийла ыра,
Кушта але мурым мура,
Эре марла гына кутыра –
Ушныза!

Кö мÿндыр эрвелне ила
Да йот мланде южым шÿла,
Кöлан чимарий йÿла
Лишыл да тудлан йÿкла –
Ушныза!

Алёна ИВАНОВА,
редактор

«ВиАр» газет, 5 (7) номер, 29 декабрь 2009 ий

Реклама

2 thoughts on “Марий улам, марла ойлем, марий улмем дене кугешнем!

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s