Мыланна возат

Мый Настя Сайпашева улам. Ешем Мишкан районысо Измар ялыште ила, но илышемын тÿҥ йыжыҥже-влак Утымбай ял дене кылдалтыныт, молан манаш гын Измар ялышке куснымыланна шукыжак ок лий. Утымбай ялыштак икымше классыш каенам да 10-шо класс марте шинчымашым погенам. 6-шо класс гыч почеламут-влакым возкалем. Почеламут деке корным йöратыме туныктышем Надежда Павловна почын да эре уло кумылжо дене шÿмем вÿчкен, нöлтен шоген.

2008-ше ий марте Тымбай ялышке тунемаш коштынам. Тунемме жапем-влак ушыштем чевер кечын уло шокшыж дене ырыктымыжла, южгунам йÿштö йÿр лийын опталмыла да угыч мардеж пуалын, кошкыктен, чевер кечылан канде кавам почын пуымыла кодыныт. Изинекак иктаж-могай финн-угор йылмым тунемаш шонымаш дене илем. Да тиде, мутат уке, лач шонымаш гына лийын.

Но икана Надежда Павловна мыланем Венгрийышке тунемаш каяш поро каҥашым пуыш. Мый кöнышым. Тыге Венгрийысе Балинт Балашши лÿмеш институтын студенткыже лийым, тыште ик ий гына тунемман. Тунемаш пураш пеш неле ыле, кугу конкурсым эртенам. Кызыт икымше курсын студенткыже улам, венгр йылмым, мадьяр калыкын эртыме корныжым, тÿвыражым, йÿлажым тунемам. Вашке экзамен-влакым кучаш тÿҥалам. Балинт Балашши институт деч вара иктаж-могай университетыш тунемаш пураш шонымашем уло. Мый Будапештысе Лоранд Этвеш лÿмеш университетым ойыренам.

Ончыкшым мый венгр йылмым да сылнымутым тунемаш шонем. Мо лийшашым илыш ончыкта. Мый шке волгыдо пÿрымашемлан ÿшанем.

Почеламутем:

Шонет, оҥайле кайык лийын,
Ош пыл тÿшкам шотлен кошташ.
Ойлет пеш кылыклын, вашлийын:
«Тый пиалан улат, йолташ!»

Да чын, чоҥештылам тораште,
Вес тылзын корныжым тошкен,
Вес семын йылгыжыт каваште
Шÿм шÿдырна йÿлен-чÿчкен.

Шонет, куанле чурий дене
Вуем нöлтен чоҥештылам.
Я тамлешталын у юж дене,
Мый тоштым йöршын монденам.

Шонет дыр,
шöртньö кечым ужын,
Иян кидемым кÿш нöлтен,
а шокшо ныжыл тулжым муын,
Пызнаш воктекыже тыршем.

Шонет, йоча чонем каргалтын,
Шÿмемже ий ден ваш ушнен,
Чевер ош кайыкла эрталын,
Муралтыде коден каем.

Да мом ыштем, тыге пÿралтын,
Лийнам дыр кÿ шÿман курчак.
Вет титакемже шкет муралын,
Мурем ден йöршын йомынам.

Да чын, чоҥештылам мардеж ден
Ош пыл лоҥгаште муралтен.
Шÿргет нöра гын йÿр вÿд дене,
Тый пале, мыйын шÿм ойгем.

Реклама

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s