Пошкырт кундемыште 2009-ше ийым Самырык тукымын идалыкше семын палемдыме. Тидым шотыш налын, эрвелмарий самырык ÿдыр-рвезе-влак шке ушемыштым ышташ шонен пыштеныт.
Ушемым ыштыме нерген ондак Интернетыште, http://www.vkontakte.ru сайтыште, мутланымаш каен. Интернетын надырже кугу, молан манаш гын самырык ÿдыр-рвезе-влак эрвел кундемын тÿрлö луклаштыже илат: пашам ыштат, тунемыт. А икте-весышт дене интернет гочын мутланат.
Тачысе кечылан «Эрвелмарий самырык ушем» Пошкырт Республикыште регистрацийым эртен. Тудлан Уфаште, Калык-влак келшымаш пöртыштö (Дом дружбы народов), посна пöлемым пуымо. Шке уставышт уло, Кумдан палыме сÿретче Юрий Таныгин эмблемым сÿретлен. Икманаш, чылажымат закон почеш ыштыме.
Ушемын тÿҥ – Пошкырт кундемысе марий самырык-влакым пырля ушаш, икте-весе кокласе кылым пеҥгыдемдаш, шочмо калыкын йылмыжым, йÿлажым да тÿвыражым арален кодаш. Кызыт ты йодыш чылаштым тургыжландара. Очыни, шочмо калыкын ончыкылыкшо нерген кажне ÿдыр-рвезе шоналтышаш. Кунам йылме, йÿла аралалтеш, тунам гына калык ила. Икманаш, самырык-влакын кидыште калыкын ончыклыкшо.
Ушемнан икымше погынымашыже эртаралтын. Ушемын ончыклык пашажым рашемдыме. Икманаш, эркын-эркын паша кая.
Алексей ИБУЛАЕВ,
Ӱпö ола
