Олорышто – ЮНЕСКО кӱкшытан Тӱнямбал поэзий кече

Поэзий пайремын участникше-влакТек кумылет кӱза каваш,
Ок нойо писе шулдырет
Тыгай пиалым нумалаш…

Чынжымак, чонышто ю шӱдыр тулжым чӱкта гын, тудым нимо денат от йӧртӧ. Илышыштым  поэзий алан дене кылдыше еҥ-влак ты тӱняште эн пиалан улыт.

Поэзийым чапландараш идалыкыште посна кечым палемдыме: 21 март – ЮНЕСКО кӱкшытан тӱнамбал поэзий кечылан шотлалтеш. Тиде чыла возгалыше-влакын чон вургыж вучымо пайремышт. 20-шо мартыште «ВийАр» тӱвыра да келшымаш кыл ушем Параньга район Олор ялыште ты кечылан пӧлеклалтше пайремым эртарыш.

«Ик тымык ото уло мемнан элыште.
Шога тудо ото мотор ер серыште …»

Чылажат тиде почеламут корныла гыч тӱҥалын. Сергей Григорьевич Чавайн 1905 ийыште профессионал марий сылнымутлан икымше ошкылым ыштен. Ий гыч ийыш шочмо сылнымутна вияҥын, у лӱм-влак дене пойдаралтын.

Марий кундемыштына Олор ял сайын палыме. Тудо ятыр мутмастарын шочмо-кушмо верже. Юмын кидше дене ниялтыме кундем манына гын, йоҥылыш ом лий, шонем. Таклан огыл Тӱнямбал поэзий кечым лач ты ялыште пайремлаш палемдыме.

Раисия Сунгурова
Раисия Сунгурова

Поэзий пайремым Олор кундемынак шочшыжо, самырык поэтесса Раисия Сунгурова чумырен да вӱден. Тудо пайремым шке почеламут корнылаж дене тӱҥале. «ВийАр» ушемын чолга ӱдыржӧ Алевтина Потехина англичан йылме дене Сергей Чавайнын «Ото» да Валентин Колумбын «Ни шоналын омыл…» финн йылмыш кусарыме почеламут-влакым сылнын лудын пуыш. Уста йоча-влаклан президент школышто тунемше Аня Савельева, тиде кечым моктен да поро пошкудыжо-влакым саламлен, флейта дене ныжыл семым йоҥгалтарыш. Сылнысем чылаштым сылнымут аланыш шупшыльо. Лач тыгай кумыл дене калык Валентин Колумб лӱмеш рӱдер-тоштер вуйлатыше Владимир Козловым вашлие. Тудо поэзийым йӧратыше да аклыше-влакым ЮНЕСКО кӱкшытыштӧ эртарыме волгыдо пайрем дене саламлыш да верысе школ коллектив ден тунемше-шамычлан сай лектышым сугыньлен, книга пӧлекым кучыктыш.

nikitina
Надежда Никитина

Нунат ты пайремлан кӱлынак ямдылалтыныт. Йоча-влак почеламут-влакым лудыч, муро-влакым йонгалтарышт, шке верысе мутмастарышт дене палдарышт. Кызытат калык порын шарна Еремей Герасимовым, Александр Ороспаевым, кугешнен ойла Татьяна Очеева, Надежда Никитина, Ирина Делянова, Геннадий Ороспаев, Валерий Очеев  нерген. Нунын сылнымут корныштым презентаций йӧн дене палдарышт.

Варажым ушемнан вуйлатышыже Алена Иванова шке саламмутшым ойлыш, поэт Альберт Васильев почеламут корнылажым пӧлеклыш, верысе мутмастар Максим Делянов погынышо-влаклан поро тыланымашым сугыньлыш. Усола ял шотан илем администрацийым вуйлатыше Юрий Александрович Сидоров Максим Григорьевичлан Олор кунде-мым чапландарен шогымыжлан таумутым каласыш да пеледыш аршашым кучыктыш. Пайремыш сылнымут мастарын тунемшыже, Олык Ипай лӱмеш премийын лауреатше Надежда Никитинат толын. Шке калыкшылан поро тыланымаш да поэзий кумыл дене шокшо мутпӧлекым ыштыш.

Владимир Козлов пайрем годым ойлаТӱнямбал поэзий кечылан пӧлеклалтше пайремыш мутын вийжым да акшым шижын моштышо еҥ-влак погыненыт ыле. Нунын коклаште самырык поэтесса, «Кугарня» газетын тӱҥ редакторжын алмаштышыже Эльвира Куклинам палемден кодыман. Поэзий ден муро тӱня чак кылдалтыныт. Мурызо шӱдыр-влак пайремлан куан тӱсым, куатле ямым пурташ тыршеныт. Ныжылге йӱкшӧ дене Надежда Пашкина, весела койышыжо дене Володя Матвеев кажныжын чонышкыжо лайыкым конденыт.

Ила гын шӱдыр чоныштет, кунам гынат тый тидым шижат, умылет. Пайрем кече тиде чон шижмашым рашемдыш.

Чӱкталтеш шӱдырет йӱд каваште,
Корнышкет чинче-вунчым шавал.
Йоҥгалтеш марий мутын шке ямже,
Марий калыкна ынже рушаҥ.

Тӱнямбал поэзий кече Олор ялыште мунлынак эртыш. Вет тыште южшат асыл юапан, калыкшат посна волгыдо кумылан. Мемнан дене унам эреак шокшын вашлийыт, эн сай родо семын ончат, гармонь йӱк дене ужатен колтат.

Тау ял калыклан.

АЛАНУР Наюк

Реклама

One thought on “Олорышто – ЮНЕСКО кӱкшытан Тӱнямбал поэзий кече

  1. Пеш сай паша. Самырык тукымым эшеат чотрак шочмо йылмылан кумылаҥдаш кӱлеш. Йылме ила-калык ила.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s