Йыван Кырлалан — 100 ий

kyrlaЙыван Кырлан шочмыжлан 100 ий темме лӱмгечым кумдан але кумдан огыл пайремленыт? Республикысе прессым ончаш гын, кумдан пайремлыме манын палемдалтеш. Вес могырым ончалаш гын – тӱнялан палыме айдемын лӱмгечыжым тӱнямбал кӱкшытыштак вашлийман ыле. Тидын шотышто пеш шуко ситыдымаш уло. Вет Йыван Кырла – тӱнямбал кӱкшытан айдемыш савырнен. Но вот тыге аклен пайремлымашыже ок кой.

Марий Эл деч ӧрдыж кундемыште шуко вере мо палемденыт тиде кечым? Мыланна тыге чучеш, пуйто Башкортостаныште, Татарстаныште, Угарман кундемыште тиде пайремым нимо семынат палемден огытыл. Ала иктаж изирак мероприятий лийын гын веле? Но тидыже увер семын шарлен шуктен огыл.

Мутат уке, тидын нерген ик-кок ий ончычак шоналтыман ыле. Но правительстве кӱкшытыштӧ пунчалым моткоч вараш лукмо. Моло ситыдымашат чот палдырна. Да эше тиде тупела кризисше…
Туге гынат посна кундемлаште энтузиаст-влакын тыршымыштлан кӧра тудо палемдалтын. Нунын кокла гыч 20 мартыште эртарыме Москошто «Землячество Марий Элын» да «ВийАр» ушемын Санкт-Петербургысо пӧлкажын эртарыме пайрем касыштым палемден кертына.

Моско эҥер серыште

kyrla_mosko«Землячество Марий Эл», мутат уке, Йыван Кырлан 100 ияш лӱмгечыжым республикына деч ӧрдыжтӧ эн кумдан да кӱкшын эртарен.

Тиде вашлиймаш кас Венгр тӱвыра увер рӱдерыште эртен.

Тиде пайремыш Москошто илыше ятыр лӱмлӧ марий еҥ погынен. Тыгак Моско правительствынат, Венгр тӱвыра увер рӱдерынат пашаеҥже-влак лийыныт. Нуно марий калыкын лӱмлӧ эргыже нерген кӱкшын аклыме шергакан мутым ойленыт.

Касым ямдылымаште да эртарен колтымаште «Марий Эл Землячествын» ончычсо вуйлатышыже Ю.И. Ерофеев, тыгак кызыт Москошто илыше да пашам ыштыше марий режиссер В.А. Пектеев кугу надырым пыштеныт. Тау землячествын Каҥашыжлан.

Нева эҥер серыште

Йыван Кырлалан 100 ий темме лӱмгечылан пӧлеклыме мероприятийым «ВийАр» ушемын пӧлкаже ямдылен да 26 мартыште эртарен. Тыште Санкт-Петербургысо Театр академийын студенткыже Эвика Козлова чолгалыкым ончыктен. Тушко ты олаште тунемше, пашам ыштыше самырык-влак погыненыт. Нуно шкеак эртарашлан верым кычалыныт да кутырен келшеныт. Тидлан «Дом молодежи» кӧнен да чыла йӧным ыштен. Чаманаш гына кодеш, калыкым пеш шукыжак поген кертме огыл.

Тушто Йыван Кырлан кумдан палыме киноактер да поэзий усталыкше нерген каласкалыме. Самырык-влак докладымат шкеак ямдыленыт. Тыгак «Путевка в жизнь» кинофильм гыч ужаш-влакым ончымо да каҥашыме.

Погынышо-влаклан Санкт-Петербургышто илыше самырык марий ӱдыр-рвезе-влакын марий вургемым чиен толын, марий мурым йоҥгалтарымышт, тавалтен колтымышт кугун келшен. Вет тысе энтузиаст-влак икымше гана огыл тыгай концертым ончыктат.

Чаманаш гына кодеш, кугу чинан чиновник-влак тыште лийын огытыл.

Л. КӰОТО,
Йошкар-Ола

Реклама

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s