Сылнымут лук

Тӱня ош эҥыремышвотышто

Эҥыремышвотыш шылын ош тӱня.
Йолгыжалте ото, ош, ужар кына.
Кечыйол лӱҥгалтыш вожыл савырнен.
Ош висвисым моли тудо йӧратен?

А чолпан, аваже игыж-влак почеш,
Оҥарен йочажым, тупела коеш.
Мый, манеш,
кастене эр возам малаш,
Шым шагат эрдене кынелам пашаш.

Да конча йӱд мучко ош висвис алан,
Тудын мотор тӱсшӧ телымат поян.
Но молан гын йӱштӧ, могыр чытыра?
Йодышлан вашмутым пуыш тӱтыра.

«Чылалан шке пагыт:
тымык, шокшо, йӱр…
Кажныже сӧрале, ойыртемже – тӧр:
Лие кеҥеж шокшо, шыже южгата,
Март шумеке угыч шошо шырата.

Поран ырла

Кече лукто пычалым. Мераҥ чытыра.
Мераҥже – пырчак луман шем чодыра.
Кылмыктен пуйто тудым
ий йӱштӧ йӧршеш,
Я ир пире – поранже
«ырлен» йыр пӧрдеш.

Чу, ончал ян, чолпанже лӱя кушкырак?
Луй тӱшка гай шаланыш
волгалтше пурак.
Теве курык лапкаште йоча юарла,
Ечым луй эмгатен, пӧрдын ӱлык вола.

Лум почеш

Могае мландывалне неле
Йолгорным пеҥгыдын тошкаш.
Эртен кеҥеж, толеш ош теле,
Да шарнымаш кодеш шарнаш.

Лышташ оралгыше той тӱсым
Леведе, шудым петырен.
А кож тугак рӱзалын лӱсым,
Ок нарынчал, чот ужарген.

Мыят докан ты ош тӱняште,
Кожлак вашталдыме кодам.
Ош лум чӱчкен лӱҥга ӱмашсе,
Шижде почешыже пӧрдам.

Наҥгай пырля кычкен мардежым,
Пӱртӱслан кумылем сулем.
Мый вашлиям эрла март кечым,
Лий шошо пагыт, ӱмырем.

Лумэрге

Пӧрдеш ош лум, вӱчкен лай южым,
Коеш мардеж ден модшыла.
Мый палынем ты рвезын лӱмжым.
Эртен коштам, ужеш ала?

Чонемлан тӱсшӧ пеш келшалын,
Мыят ынде эре шкетак.
Трук вачыж гыч изиш шӱкальым.
Ыш пелештал. Сырен векат.

Ок пӧрд ош лум, ок вӱчкӧ южым,
Мардеж уке – покташ нигӧм…

Раисия СУНГУРОВА

Реклама

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s